و بعدين معاكي يا بلد...... البر مش جايباه
مش خلصتك من الظلم....قلتي مش سايباه
و سلمتك الظالم....قلتي مش عايزاه
يوم يللا نحاكمه .... و يوم أنا مسامحاه
ولما قلت أشيل عنك همك...قلتي أنا شايلاه
طب أعمل ايه في عندك...اللي احترت أنا وياه
مصر يا أمي
ساعات بحس إني ولي أمرك
و إنك طفلة متعلقة في كمي
خايفة تمسكي الجمر يلسعك
وراسك و ألف سيف لانتي واخداه
و تدبدبي في الأرض و تزعلي
و تغضبي و تكشري
و لما وشك يلوح ببكاه
دموعي تنزل تمسِك دموعك
و جرحي يفتح يلئِم جروحك
و همي يتحول لبسمة تواسي همومك
ولما اسمك يحس الخطر...يلاقي روحي فداه
و بعدين معاكي يابلد.....البر مش جايباه
و ازاي تجيبي البر وانتي مش شايفاه؟
و ازاي تشوفي البر و انتي مش حاساه؟
و ازاي تحسي البر و انتي مش عارفاه؟
يا مصر لو مش عارفه برك فين
اسأليني أقولك طريق البر منين
يا مصر برك في ولادك
انتي بس اديهم أمانك
و اتطمني مش هيخربوكي
هم فعلا أولياء أمرك مش هيخربوكي
و لو رجعوا قالوا احنا ولادها و مصر أمي
مش هيبيعوكي
مش هيسيبوكي
و لا بخيرك لعدوك هيقدموكي
ولو يوم نطقتي الحق..مش هيخرسوكي
و لو يوم طلبتي العدل..مش هيسجنوكي
أصل دول فعلا ولادك
و ولادك عمرهم ما يخونوكي
ليست هناك تعليقات:
إرسال تعليق